Home » , , , , , , » Bintangor Goroka Lahanis Lukluk long Bukim Fes Gren Fainol Spot

Bintangor Goroka Lahanis Lukluk long Bukim Fes Gren Fainol Spot

POT MOSBI - Ol sapotas, folowas na bikpela namba bilong spektetas long Isten Hailans bai pulim lain na kapsait i go long hom graun long Nesenel Spot Institut (NSI) long dispela Sande long lukim Digicel Kap mesa semi fainol pilai we bai kamap namel long maina primia Bintangor Goroka Lahanis na Rabaul Guria.

Guria husat i bin ron bihainim Lahanis long namba 2 posisen long kompetisen points lada i kilim dai paia bilong Pot Mosbi Vipers 28 – 8 long fes raun bilong ol fainols long Kalabond pilai graun long Kokopo long Sande. Bihain long dispela win, ol tobras bai katim solwara i kam antap long NSI long Goroka long bungim ol Apo. Na mipela bai lukim dispela pilai olsem ripple bilong 2012 gren fainol na gren fainol pilai bilong 2013.

Dispela em i no liklik kompetisen pilai – em bikpela mesa semi fainol, olsem na ol Apo husat i no lusim wanpela gem long hom graun long NSI mas redi gut long bungim ol Tobras long Sande. Lahanis i bin sindaun na malolo long wanpela wik na long dispela wiken ol boi Apo bai i go insait long pilai graun fres na redi long yusim gut ol biknem na ki pilaia long franlain olsem kepten Nicko Ubile, Gonzella Urakusie, Wesley Mohokule, George Abba na Yappa Kapu. Na long sapotim ol long ranim bal long beklain na kamapim sans long skoa em John Arme na Adex Wera bai i go pas na tupela bai i ken kisim bikpela sapot i kam long Kevin Inagafa, Spiro Mikaive, Noel Zemming na Bernard Tatsim Junia.

Ubile, Urakusie Mohokule, Abba, Kappu, Arme na Wera em ol pilaia husat i save gut long fainol gem na presa futbal na ol i ken pilai strong long taim presa i kamap long taim bilong pilai. Na wina bilong dispela gem bai i go stret long bukim fes gren fainol spot, na lusa bai go daun long pilaim wina bilong Enga Mioks na Pot Mosbi Vipers. Lahanis i ken luk fowat long mekim gren fainol long wnem, em bai pilai long hom graun na wantaim ful sapot bilong ol lokel sapota em bai winim dispela gem na i go antap long gren fainol. Nau yet – frensais ona o papa bilong Lahanis tim Simon Sia apil long hom graun na wantim long stap isi na sapot gut long gutpela pasin, long wanem, sapos ol i no nap stap isi na sapot gut, ol Digicel Kap gem bai i no nap kamap long Goroka long ol arapela yia i kam bihain.

Em i go moa na tok, tim bilong em i no lus long NSI long dispela sisen. Olsem na sapos Guria i kam antap long bungim Lahanis, long lukluk bilong em- tupela tim i gat wankain strong na stail bilong pilai tasol Lahanis wantaim hom graun sapot bai i ken lukluk long winim dispela gem na i go long pilai insait long 2013 gren fainol we bai kamap long tupela wik i kam. [WantokNiuspepa]

0 comments:

Post a Comment

KIRIM ARSIP

Silahkan kirim arsip berita anda ke berita@papua.us