Home » , , , , , , , , , » Koiari Park Edventis Sekenderi Skul Kisim 20 Kompiuta bilong Powes Parkop

Koiari Park Edventis Sekenderi Skul Kisim 20 Kompiuta bilong Powes Parkop

POT MOSBI - Koiari Park Edventis Sekenderi Skul i gat tupela kompiuta tasol na nau ol i kisim 20 moa. Ol sumatin i amamas na i paitim han long taim NCD Gavana, Powes Parkop i bringim ol dispepla kompiuta long ol, skul bilong ol.

Ol kompiuta i kam olsem wanpela mekpas tasol na i kosim K55, 660. Donesen bilong ol kompiuta em i wanpela bilong ol progrem bilong Gavana Parkop long sapotim ol sekenderi skul long helpim ol long lainim samting.

Em i bin helpim pinis Charles Lawanga Sekenderi Skul long yia i go pinis na nau Koiari Park Edventis Sekenderi. Bihainim ol sekenderi skul gavana i gat plen long helpim ol praimeri skul na bihain elementeri na kisim 2017, em i plen long karamapim olgeta skul insait long NCD.

Gavana Parkop i putim edukesen bilong ol pikinini namba wan na em i putim pinis K30 milian insait long 5 yia, long kirapim ol klasrum bilong praimeri na sekenderi skul, haus tisa, toilet, ol des bilong ol elementeri skul, ol teks buk, laibreri buk na ol kompiuta.

“Bikpela samting mi laik helpim ol skul long ol sumatin mas skul gut na kamap ol ‘A’ gred sumatin,” Gavana Pakop i tok long taim em i givim kompiuta long Koiari Park.

Prinsipel, Erick Passingan i tok tenkyu long gavana long helpim bilong em long Koiari Park na tu long ol arapela skul long NCD. Em i tok, skul i bin stat tasol long dispela yia na ol i gat tupela kompiuta tasol, wanpela em bilong prinsipel na narapela ol arapela tisa i save yusim long helpim ol sumatin.

“Tenkyu long yu putim amamas long bel bilong ol sumatin. Taim ol i lukim ol kompiuta em amamas i kilim ol stret,” Mista Passingan i tok.

Gavana i tok, Koiari Park em i nupela skul na isi, isi em bai gro olsem wanpela nambawan skul na em i strongim ol sumatin long wok strong long skul bilong ol. Em i tok strong long ol papamama long sapotim skul wantaim ol fan resing wok bilong skul, helpim ol pikinini long bihain taim. [WantokNiuspepa]

0 comments:

Post a Comment

KIRIM ARSIP

Silahkan kirim arsip berita anda ke berita@papua.us