Home » , , , , , , , , , , , » Ol Sios i Gat Wok long Givim Spirituel Stia

Ol Sios i Gat Wok long Givim Spirituel Stia

GOROKA (ISTEN HAILANS) - Sios long dispela kantri i gat wok long givim spirituel stia na tu, wok wantaim gavman long kisim ol sevis i go long pipel. Na ol sios i gutpela patna bilong gavman long kamapim ol wok divelopmen na kisim helt, edukesen, sosel na spirituel sevis i go long ol pipel, Praim Minista, Peter O’Neill i bin tok olsem long namba 6 Nesenel Kavanen na Prea De selebresen we samting olsem 10,000 pipel i bin stap long en long Goroka.

Mista O’Neill wantaim 4-pela kebinet minista na 12-pela Palamen memba i bin go long Goroka bihainim askim bilong Isten Hailans Gavana, Julie Soso. Soso i bin askim praim minista longgo pas long dispela bikpela de kantri i luksave long Bikpela.

Em i tok wantaim stia bilong Bikpela, gavman i wok long kamapim sampela gutpela samting olsem fri edukesen na helt sevis, kamapim gut lo na oda ol infrastraksa olsem ol rot, bris na ples balus. Tasol em i tok long 40 krismas i go pinis, PNG i no bin manesim gut ol mani na risos samting long kamapim gutpela divelopmen.

Tasol long 40 yia i kam, “yumi mas senis na kontribiut gut long divelopim kantri, na tu, kisim ol sevis i go long ol pipel insait long ol rurel eria”.

Hetbisop bilong Luteran Sios long PNG, Reveren Giegere Wenge i bin tok Bikpela i givim planti blesing long PNG, tasol kantri i gat hevi long hap bilong manesmen. Long wankain taim tu, Mista O’Neill na Misis Soso i bin tok promis long wan wan long ol bai givim K1 milien long sanapim spesel Tabenakel we pipel i ken beten long en. Kos bilong sanapim dispela Tabwnakel em K2 milien.

Long ol narapela hap bilong kantri, ol Kristen i bin putim han wantaim na pre long gavman na ol narapela lida i givim gutpela stia long kantri, daunim ol lo na oda hevi, pasin bilong bagarapim ol meri, ol lida i givim gutpela gavanens na lukautim gut mani em kantri I kisim long ol risos. Tasol long taim kantri i selebretim dispela Kavanen De, long Mosbi i bin gat 5-pela pipel i dai long wiken na pasin bilong repim wanpela meri i kamap.

Wanpela long olol lain i dai em olpela Palamen memba bilong Simbu husat I bin wanpela gavman minista tu. Dispela pasin i soim olsem yumi gat bikpela wok long senisim pasin nogut na strongim pasin bilong rispek, luksave long narapela, daunim pasin bilong belhat na bihainim ol toktok na pasin we ol pipel long Kristen kantri i mas mekim. [WantokNiuspepa]

0 comments:

Post a Comment

KIRIM ARSIP

Silahkan kirim arsip berita anda ke berita@papua.us